Միլիոնատեր հարևանը / The Millionaire Next Door

Թոմաս Ստենլին և Ուիլյամ Դանկոն քսան տարի ուսումնասիրել են, թե ինչպես են հաջողակ ամերիկացիները վաստակում ու ծախսում իրենց փողը։ Իրենց հարցումներում նրանք ներգրավել էին հազար մարդու, որոնցից յուրաքանչյուրը պետք է պատասխաներ երկու հարյուր հարցի։ Բազմաթիվ հեղինակներ իրենց ժամանակը ծախսում են՝ ուսումնասիրելով ու գրելով հարստանալու հնարքների մասին։ Մինչդեռ Ստենլին կենտրոնանում է հարուստների և սովորական ամերիկացիների կյանքի տարբերությունները բացահայտելու վրա։

Այս գիրքը բացատրում է, թե ինչպես է մարդկանց մեջ ձևավորվում փողի հետ կապված որոշակի վերաբերմունք ու վարքագիծ։ Դրանք փոխանցվում են ծնողներից և կանխորոշում՝ արդյոք կդառնա՞ք հարուստ, թե ոչ։ Գրքում ներկայացվում են նաև միլիոնատերերի մտածողության որոշակի օրինաչափություններ ու սկզբունքներ, որոնք յուրաքանչյուրը կարող է կիրառել։

«Միլիոնատեր հարևանը» գիրք է ամերիկյան միլիոնատերերի կյանքի մասին։ Հեղինակները բացահայտում են, որ ամերիկյան միլիոնատերերի մեծ մասն ունևոր, բարձր դասի մարդիկ չեն, որոնց մասին առաջինն ենք մտածում «միլիոնատեր» ասելիս։ Նրանք միջին խավի մարդիկ են, որոնք կուտակել են իրենց հարստությունն աշխատասիրության, խնայողության և ներդրումների հաշվին։

Ըստ հեղինակների` չկա բիզնեսների հատուկ ցանկ, որից կարող եք ընտրել մեկը և դառնալ միլիոնատեր։ Խնդիրը ոչ թե բիզնեսի տեսակն է, այլ այն, թե ինչպես կվարեք այն։ Սիրո՞ւմ եք այն, թե՞ ոչ։ Ինչպե՞ս եք կառավարում անձնական ֆինանսները։ Սակայն մի բան ակնհայտ է. միլիոնատեր դառնալու ձեր շանսը մեծանում է, երբ բիզնեսի սեփականատեր եք, այլ ոչ թե աշխատում եք ուրիշի համար։