Արագ և դանդաղ մտածողություն / Thinking Fast and Slow

Դենիել Քանեմանի՝ 2011թ. լույս տեսած «Արագ և դանդաղ մտածողություն» աշխատությունը այբբենարան է ծառայում հոգեբանության ենթաճյուղ հանդիսացող վարքային տնտեսագիտության համար: Վարքային տնտեսագիտությունն ուսումնասիրում է այն ստրատեգիաները, որոնք մարդիկ օգտագործում են որոշումներ կայացնելիս և ռիսկերը գնահատելիս: Հեղինակը բացահայտում է լայն տարածում գտած հոգեբանական տեսությունները, որոնք զարգացրել է իր գործընկեր Ամոս Տվերսկիի հետ համատեղ աշխատանքի ընթացքում 1970-ականներից սկսած, իր սեփական հետազոտություններն այնպիսի թեմաներով, ինչպիսիք են ափսոսանքը, հիշողություններն ու երջանկությունը, ինչպես նաև այլ հետազոտողների աշխատություններ, որոնք կատարելագործել կամ ընդլայնել են ոլորտը:

Գրքում գլխավորապես ուսումնասիրվում են մարդկային դատողության սայթաքումները, որոնք հազվադեպ են պայմանավորված տրամաբանությամբ: Մարդու միտքը հակված է մերժել խճճված երևույթները և նախապատվությունը տալ ընդունված կաղապարներին, որոնց մեծ մասը մարդու կողմից կիրառվում է ենթագիտակցական մակարդակում: Այդ կաղապարները կանխատեսելի են, սակայն շատ բարդ է դրանցից խուսափելը: