Պետություն / The Republic

Պլատոնի ամենահայտնի աշխատությունը, որի ստեղծումը կարելի է վերագրել Սոկրատեսից ստացած դասերին, «Պետությունն» է։ Սա համարվում է առաջին քաղաքագիտական գիրքը։

Այստեղ Պլատոնյան մեթոդով տրվում են դատողություններ արդարության մասին։ Գրքում մի խումբ մարդիկ որոշում են ստեղծել երևակայական պետություն, որպեսզի կարողանան գտնել արդարության բնորոշումը։ Քաղաքի բնակչությունը բաժանված է դասերի՝

● կառավարիչներ. սրանք այն մարդիկ են, որոնք հասկանում են ճիշտն ու սխալը,

● պահապաններ. նրանք պաշտպանում են քաղաքը և հոգ տանում մարդկանց մասին,

● արտադրողներ. նրանք ապահովում են մարդկանց նյութական բարիքներով և ծառայություններով։

Գիրքը յուրօրինակ երկխոսություն է Սոկրատեսի և Աթենքի բնակիչների միջև արդարության և իդեալական պետության մասին։ Հեղինակը ցույց է տալիս պետության իդեալական կառուցվածքը։ Պլատոնն այն նմանեցնում է մարդու օրգանիզմի կառուցվածքի և կենսագործունեության հետ։ Հեղինակը հենց սկզբից ակնարկում է, որ իր պատկերացումները իդեալականացված են, և այդ պատճառով էլ դրանց հնարավոր չէ հասնել։ Չէ՞ որ ինչպես չկա բոլոր առումներով իդեալական մարդ, այնպես էլ իդեալական պետություն չի կարող լինել։ Պետության մասին նրա պատկերացումները կոչված են ծառայելու որպես կողմնորոշիչ, մի բան, որին պետք է ձգտել։